அழைப்பாளனின் பண்புகள்

இறைவனின் திருப்பெயரால்

புகழனைத்தும் அல்லாஹ் ஒருவனுக்கே

இஸ்லாமிய பிரச்சாரம் செய்வது, நபிமார்கள், ரசூல்மார்களின் தலையாய பணியாகும். அல்லாஹ்வினால் இவர்கள் தேர்ந்தெடுக்கப்பட்டு, அவனுடைய அடியார்களிடம் அனுப்பி வைக்கப்பட்ட தூதர்களாவார்கள். நபிமார்களின் பிரதிநிதிகளும் வாரிசுகாரர்களுமான உண்மை விசுவாசிகளின் முக்கியப்பணியாகவும் இது இருக்கின்றது. நற்செயல்களில் ஈமானுக்கு அடுத்துள்ள பணியாகவும் இருக்கின்றது. ஏனெனில் மக்களுக்கு நேர்வழி காட்டுவதும், நற்செயல்களில் அவர்களுக்கு ஆர்வமூட்டுவதும், தீயசெயல்களைப் பற்றி வெறுப்பூட்டுவதும், காரிருளிலிருந்து இஸ்லாம் எனும் வெளிச்சத்திற்கு அவர்களை அழைத்து வந்து சேர்ப்பதும் தான் , இதனுடைய பலாபலன்களாகும்.

எவர் அல்லாஹ்வின் பக்கம் (மக்களை) அழைத்து, ஸாலிஹான (நல்ல) அமல்கள் செய்து; ''நிச்சயமாக நான் (அல்லாஹ்வுக்கு முற்றிலும் வழிபட்ட) முஸ்லிம்களில் நின்றும் உள்ளவன் என்று கூறுகின்றாரோ, அவரைவிட சொல்லால் அழகியவர் யார்?'' (இருக்கின்றார்?) [திருக்குர்ஆன் 41:33]

அல்லாஹ்வின் பக்கம் அழைப்பது என்பதன் கருத்து இதுதான்:

• இறைவன் நமக்களித்துள்ள மார்க்கத்தின் பக்கம் மக்களை அழைப்பது.
• அவனுடைய நேர்வழியைப் பின்பற்றுவது.
• அவனளித்துள்ள வாழ்க்கைப் பாதையை அகில உலகிலும் நிலைப் பெறச்செய்வது.
• வழிபாட்டிலும், உதவிகோருவதிலும், அடிபணிவதிலும் அல்லாஹ் ஒருவனை மட்டுமே ஏற்றுக்கொள்வது.
• அல்லாஹ்வைத் தவிர மற்றவருக்கு செய்யப்பட்டு வரும் அனைத்து தீய சடங்குகளிலிருந்தும் அகன்றுவிடுவது.
• இறைவன் விதித்துள்ளவற்றை நிறைவேற்றுவது.
• அவன் தடைசெய்துள்ளவற்றிலிருந்து மக்களை தடுத்து நிறுத்துவது.
• நன்மையான காரியங்களை மக்களுக்கு ஏவுவது.
• தீமையான காரியங்களிலிருந்து மக்களை தடுத்து நிறுத்துவது.-அவசியம் ஏற்பட்டால் இறைவழியில் அறப்போர் புரிவது.

சுருங்கக் கூறின் கூடுதல் குறைவின்றி பரிபூரணமாக, இஸ்லாமிய அழைப்பை மக்களிடம் எடுத்துக் கூறுவதாகும். அதே சமயம், இதைச் செய்பவர்கள் தூய எண்ணத்துடனேயே இப்பணியை மேற்கொள்ள வேண்டுமே தவிர, எந்த வகையிலும் சுயநலம் வந்துவிடக்கூடாது.

இவ்வுன்னதமான பிரச்சாரப் பணியில் ஈடுபடுகின்றவர்கள், திறமைமிக்க பிரச்சாரகர்களாக இருப்பது அவசியத்திலும் அவசியமாகும். பிரச்சாரப் பணிக்குள்ள கண்ணியத்துடனும் பெருமையுடனும் தங்களை இணைத்துக்கொள்ள தக்க வகையில், அவர்கள் நடந்து காட்ட வேண்டும். மனித உள்ளத்தின் ஆழத்திலும் அறிவுகளிலும் இஸ்லாமிய ஒளியின் சுடரை வேகமாக பாய்ச்சுகின்ற வல்லமை உள்ளவர்களாகவும் அவர்கள் இருக்க வேண்டும். இப்பணியை செய்யத் தொடங்குவதற்கு முன்பாக தங்களின் புறத்தோற்றத்திலும் மாறுதல் ஏற்பட்டு, தங்களின் வாழ்வை ஒளிமயமானதாக ஆக்கிக்கொண்டிருக்க வேண்டும். இப்படிப்பட்ட திறமையானவன் தான், பிரச்சாரப் பணியை முறையோடு செயல்பட முடுக்கிவிடக்கூடிய காந்தமாக திகழ்வான்.

அறியாமை, நப்பாசை, ஆக்கிரமிப்பு, குழப்பம் விளைவித்தல் போன்ற தீமைகளை எதிர்த்து போராட விரும்புகின்ற பிரச்சாரகனுக்கு, அப்போரில் அவனைத் தாக்க வரும் எதிர்சக்திகளை தடுக்கவும், வீழ்த்தவும் பல்வேறு ஆயுதங்கள் தேவைப்படுகின்றன.

இஸ்லாமிய பிரச்சாரகனுக்குத் தேவையான ஆயுதங்களில் ஈமான் என்ற ஆயுதம் தான் முதன்மையானது. இதில் எள்ளின் முனையளவு கூட சந்தேகம் இல்லை. இந்த ஆயுதம் இல்லாவிட்டால் அவனிடம் உள்ள ஏனைய ஆயுதங்களும் பாழாகி, பயனற்றதாகிவிடும். ஈமான் என்பது வாயளவில் சொல்லித்திரிகின்ற ஒன்றல்ல, மனித உள்ளத்திலும் ஆழப்பதிந்து, செயல்களிலும் அது உணமைப் படுத்தப்பட வேண்டும். இதுதான் உண்மையான ஈமான் ஆகும்.

இஸ்லாமிய பிரச்சாரகனுக்குத் தேவையான இரண்டாவது ஆயுதம் நற்குணங்களாகும். இந்த நற்பண்புகள் உள்ள உறுதியோடு ஈமான் கொள்வதால் ஏற்படும் பலாபலனாகும். "நற்குணத்தால் சிறந்தவர்கள்தாம் ஈமானில் பரிபூரணத்துவம் பெற்ற முஸ்லிம்களாவர்" என்ற ஹதீஸ் இங்கே குறிபிடத்தக்கது.

அனைத்து நேர்வழி அழைப்பாளர்களுக்கும் தலைவரான முஹம்மது(ஸல்) அவர்களைப் பற்றி இறைவன் வர்ணித்துக் கூறுவதைப் பாருங்கள்:

"நிச்சயமாக நீர் மகத்தான நற்குணங்கள் உடையவராகவே இருக்கின்றீர்" [அல்குர்ஆன் 68:4]

"(நபியே!) அல்லாஹ்வுடைய ரஹ்மத்தின் காரணமாகவே நீர் அவர்களிடம் மென்மையாக (கனிவாக) நடந்து கொள்கிறீர்;. (சொல்லில்) நீர் கடுகடுப்பானவராகவும், கடின சித்தமுடையவராகவும் இருந்திருப்பீரானால், அவர்கள் உம் சமூகத்தை விட்டும் ஓடிப்போயிருப்பார்கள்." [அல்குர்ஆன் 3:159]

கல்வியறிவு இதன் மூன்றாவது ஆயுதமாகும். ஆத்மீகத்திற்கும், ஒழுக்க நெறிகளுக்கும் இதுவே அடிப்படையாக அமைந்துள்ளது. அழைப்புப்பணி அல்லது பிரச்சாரப்பணி என்பது கொடைத்தன்மையைப் போன்றதாகும். கல்வியறிவோ கலாச்சார மேம்பாடோ இல்லாத ஒருவன், அவற்றை மற்றவருக்கு எவ்வாறு எடுத்துக் கூற முடியும். தன்னிடம் இல்லாத ஒன்றை மற்றவருக்கு எவரும் கொடுக்க முடியாது. இதே போன்று, நிர்ணயிக்கப்பட்டுள்ள சொத்தை உடமையாக்கிக் கொள்ளாத ஒருவனால் எவ்வாறு 'ஜகாத்'வழங்க முடியும்.

மூலம்: கலாநிதி யூசுஃப் அல் கர்ளாவி

அல்லாஹ்வின் உதவியால் அழைப்பாளனின் பண்புகளை முழுமையாக உள்வாங்கிக்கொள்வோமாக!